LEGAZPI CITY – Mahigot na nakabantay an Gobierno Provincial kan Catanduanes sa dagsaan kan mga tawo sa mga pampublikong pasyaran, mall, terminal, asin pantalan sa kasagsagan kan bisperas asin mismong aldaw kan kapaskuhan.
Segun ki Governor Patrick Azanza sa intrevista kan Bombo Radyo Legazpi na naipadagos an kaugmahan sa saindang provincia ngonian na kapaskuhan sa ibong kan pinadapa sinda kan epekto ni Bagyong Uwan.
Pinag-iingat niya man an publiko sa paggamit nin mga paputok urog nang mawot nindang ma-otob an zero casualty ngonian na holiday season.
Sa kagayunan suboot an marikas man na natawan nin aksyon an sarong insidente nin landslide sa saindang lugar nganing dae na magkaigwa nin kaulangan sa mga byahe kan namamanwaan pasiring sa saindang mga pamilya.
Pigdugang pa kan opisyal na dapat magin rigmat an publiko sa ibong kan pagselebrar nin holiday huli ta pwedesir mangyari an landslide maski anong oras na pwedesir magtaong peligro.
Pig-asigurar niya man na 24/7 na bukas asin alerto an saindang mga Disaster Risk Reduction and Management Personnel kan manlain-laing banwaan ngonian na kapaskuhan asin bagong taon nganing magresponde kun kinakaipuhan.
Sa hudyan an pighagad ni Governor Azanza sa saiyang nasasakupan na mag-ingat asin mag-ugma ngonian na kapaskuhan mantang rumdumon an pagkamundag ni Hesuskristo.
