LEGAZPI CITY-Pignegaran kan Department of Justice (DOJ) na igwa nin anuman na ‘special treatment’ para sa kontratista na si Sarah Discaya sa tahaw kan kadakol na kaso na may relasyon sa anomalya kan mga flood control projects.
Nanindugan si Justice Spokesperson Atty. Si Polo Martinez na warang ‘preferential treatment’ para ki Discaya makalihis siyang magpakustodiya sa National Bureau of Investigation.
Si Sarah Discaya yaon ngonian sa kustodiya kan nasabing kawanihan kasunod kan boluntaryong pagsuko kaini.
Durante kan ‘preliminary investigation’ na ginibo sa sarong separadong kaso na saiyang inaatubang sa Malabon, piginsister asin idinara kan kawanihan si Discaya sa prosecutor’s office.
Nagsangat man an lokal na gobyerno kan Malabon nin kasong pagbalgar sa R.A. 3019 o an Anti-Graft and Corrupt Practices Act asin felony of theft laban sa kontratista.
Alagad, piglinaw ni Atty. Martinez na wara pang ipinaluwas na arrest warrant kontra ki Sarah Discaya an korteng nag-aasikaso kan mga kasong isinangat kontra saiya na may kinaaraman sa ghost infrastructure project sa Davao Occidental.
Inilipat siya sa korte kan Malita, Davao Occidental asin idinara na sa sa Regional Trial Court kan Lapu-lapu City, Cebu.
Susog sa Departmento, huli sa dapat ilipat an mga kasong may kinaaraman sa korapsyon o flood control projects anomaly sa pinakaharaning itinalaga kan ‘special anti-graft court’ sa rehiyon.
Magigirumduman na nagsangat nin kasong graft and malversation an Office of the Ombudsman kontra ki Sarah Discaya asin nagkapirang opisyales kan Department of Public Works and Highways sa Digos Regional Trial Court kan Davao Del Sur.
Alagad, segun sa Department of Justice, dae pwedesir na ikulong o ibugtak sa detention facility si Discaya enkaso warang mandamiento de aresto na ipinaluwas an husgado.
