LEGAZPI CITY – Arestado an sarong 25-anyos na bagong tukoy na street-level individual sa isinagibong buy-bust operation kan pinagsarong puwersa kan kapulisan asin anti-drug operatives bandang alas-3:38 nin hapon, Nobyembre 8, 2026, sa Polangui, Albay.
Pigbisto an suspek na si alyas “Raffy,” soltero asin residente kan Polangui, na inaresto huli sa pagbalgar sa Republic Act No. 9165 o Comprehensive Dangerous Drugs Act of 2002.
Pinangenotan an operasyon kan Polangui Municipal Police Station, sa irarom kan pangangasiwa ni PLTCOL Edgar E. Azotea, Chief of Police, katabang an Provincial Intelligence Unit kan Albay Police Provincial Office (PPO), 1st Albay Provincial Mobile Force Company, 505th Maneuver Company kan Regional Mobile Force Battalion 5, asin Philippine Drug Enforcement Agency (PDEA) Team-Albay.
Naisakatuparan an pag-aresto makalihis makabakal an poseur-buyer nin sarong heat-sealed transparent plastic sachet na igwang laog na puti asin mala-kristal na substance na pigtutubudang shabu, asin igwang gabat na 0.8 gramo asin street value na ₱5,440.00, kapalit kan ₱2,500.00 na buy-bust money.
Sa body search sa suspek, nakarekober pa an mga operatiba nin pitong dagdag na sachet na pigtutubudang shabu na igwang kabilogan gabat na poco mas o menos 5.3 gramo asin street value na ₱36,040.00, kaya sa kabilogan walong sachet na igwang gabat na 6.1 gramo asin Standard Drug Price na ₱41,480.00 an nasamsam.
Isinagibo an inventory, pagmamarka, pagkua nin litrato, asin video recording kan mga ebidensiya sa lugar kan operasyon sa presensiya nin sarong media representative, asin mga Barangay Kagawad, mantang dinara an suspek asin mga ebidensiya sa Polangui MPS para sa kaukulang disposisyon, asin susurion man siya sa Jose B. Duran Memorial District Hospital sa Ligao City.
