LEGAZPI CITY – Arestado kan mga tauhan kan Guinobatan Municipal Police Station an sarong 64-anyos na lalaki na si alyas “Tomas,” residente kan Guinobatan, Albay, huli sa paglabag sa Presidential Decree No. 1612 o Anti-Fencing Law of 1979 sa isinagibong follow-up operation bandang alas-4:30 nin hapon, Nobyembre 8, 2026, sa Guinobatan, Albay.
Namidbidan an suspek makalihis an imbestigasyon manungod sa pagkawara kan itom na iPhone 16 Pro Max na nagkakantidad nin poco mas o menos ₱86,000.00 kan biktimang si alyas “Rico,” sarong nurse asin residente man kan Guinobatan.
Segun sa imbestigasyon, bandang alas-11:45 nin aga kan parehong aldaw, nawara an cellphone kan biktima mantang nasa sarong lotto outlet sa Barangay Iraya, asin sa paagi kan tracking feature kan saiyang cellphone, natukoy niya an lokasyon kaini asin namataan an sarong pulang tricycle sa kahalabaan kan national highway sa Guinobatan.
Kan beripikahon, nabawi kan biktima an saiyang nawawarang cellphone hale sa pasahero kan tricycle na minidbidan bilang suspek, alagad naghale an suspek kaiba an tricycle asin nagpasiring sa ibang direksyon.
Tulos na nagsagibo nin follow-up investigation asin hot pursuit operation an mga pulis, kaiba an pagsusuri sa mga available na CCTV footage sa saindang nasasakupan, na nagresulta sa pagkakaaresto kan suspek bandang alas-4:30 nin hapon kan parehong aldaw.
Dinara an suspek sa Guinobatan MPS para sa kaukulang disposisyon.
