LEGAZPI CITY—Arestado an sarong newly identified high-value individual sa ginibong buy-bust operation sa Barangay San Francisco, Guinobatan, Albay.
Segun ki Albay Police Provincial Office Provincial Director Police Colonel Noel Nuñez, sa intrevista kan Bombo Radyo Legazpi, basado sa saindang profiling, an suspek an nagdidistribuir nin droga sa nasabing lugar magin sa ibang banwaan asin ciudad.
Nakua sa suspek an nasa 30 gramos nin pigtutubudang shabu na may standard value price na P204,000 magin an marked money.
Ginibo an operasyon sa pinagsarong operatiba kan Philippine Drug Enforcement Agency Office 5 Regional Special Enforcement Team asin Guinobatan Municipal Police Station.
Sa presente nasa kustodiya na ini kan kapulisan asin nahahampang sa kasong pagbalgar sa Section 5 kan Republic Act 9165 o Comprehensive Dangerous Drugs Act of 2002.
Pagdoon man kan opisyal na matrayumpo an saindang mga operasyon huli man sa kooperasyon kan namamanwaan.
