Legazpi PSO, padagos an inspection asin pagpapatrolya harani sa kadagatan makalihis an paglubog kan sarong bangka

LEGAZPI CITY – Padagos an pigsasagibong pagpapatrolya kan Legazpi City Public Safety Office sa manlain-laing parte kan ciudad mapadapit sa posibleng epekto ni Tropical Depression “Wilma”.

Ini an makalihis na sarong bangka an luminubog sa parte kan ng Legazpi City Boulevard partikular na sa Barangay Puro kasubagong aga.

Segun ki Legazpi City Public Safety Office head Octavio Rivero sa intrevista kan Bombo Radyo Legazpi na huli sa kusog kan paros asin kusog kan ukol an nagtama sa riprap an likudang parte kan bangka na nagin rason kan pagkarumpag asin paglubog kaini.

Ipinaabot na man sa Barangay Puro an nasambitang insidente nganing ma-identipikar kun residente kan nasambitang lugar an kagsadiri kan bangka.

Pigtaram pa kan opisyal na nagkataon na an narumpag na bangka an solong nasa katubigan huli ta kadaklan sa saindang nahiling na mga bangka an mga nakagilid sa baybayon.

Pangapodan ni Rivero sa publiko urog nang pig-aandaman an warang patod na pag-uuran na dara kan mga raot nin panahon.