LEGAZPI CITY-Kinumpirma ni President Ferdinand “Bongbong” Marcos Jr. na nasa 7 sa 16 na indibidwal na may warrant of arrest hale sa Sandiganbayan an nasa kustodiya na kan awtoridad katakod kan imbestigasyon sa suboot anomalya sa mga flood control project.
Saro sa mga naarestar an nasa National Bureau of Investigation (NBI), mantang nasa anom man an boluntaryong nagsuko sa Criminal Investigation and Detection Group (CIDG).
Duwang indibidwal man an presenteng nakikipag-koordinar para sa saindang pagsuko.
Ipighayag man ni President Marcos na an naarestar kan NBI an nadakop sa mismong residensya kaini.
Nagpatanid man an Presidente sa mga nagpoporbar na magtago asin sa mga nagtatabang ngani makapagtago an sarong akusado.
Sa kabilugan an nasa 16 na akusado asin pito pa kaiba si Dating Rep. Zaldy Co na nagtetenir na “at large”.
Pigenganyar man ni Marcos an mga natatadang akusado na tulos na magsuko ngani maayos na suboot an nahahampang na mga paratang sa sainda.
Pigsisierto man ni Marcos na warang espesyal na pagtrato sa mga nagsuko asin magtetenir an mga ini sa kustodiya kan NBI mantang naghahalat sa kasuguan kan korte.
