LEGAZPI CITY—Nagresulta sa pagkaka-dismantle kan sarong drug den asin pagkaka-arestar kan apat na High-Value Individuals an ginibong High Impact Operation kan mga otoridad sa Barangay Mahayahay, Cawayan, Masbate.
Segun ki Philippine Drug Enforcement Agency Masbate Provincial Officer Norman Baquedre, sa intrevista kan Bombo Radyo Legazpi, an nasabing operasyon an pinoonan ninda puon pa kan bulan nin Oktubre kun saen nagkondusir sinda nin mga serye nin surveillance sa nasabing lugar.
Durante suboot kan saindang surveillance an na-obserbaran na dakol na persona an nagpapasiring sa sarong restobar asin napag-araman na digdi nagbabakal asin piggagamit an mga pigtutubudang shabu.
Mientrastanto, binisto an mga suspek na sinda alyas “Remuel”, 34-anyos, lalaki, residente kan Barangay Pawican, Cataingan; alyas “Sammy”, 20-anyos, lalaki, residente kan Barangay Sto. Cristo, Uson; alyas “Gilbert”, 36-anyos, lalaki, residente kan Barangay Recodo, Cawayan; asin alyas “Jesma”, 44-anyos, lalaki asin residente kan Barangay Recodo, Cawayan.
Nakumpiskar digdi an nasa 8 gramos nin pigtutubudang shabu na may kantidad P54,400 kaiba an iba pang drug paraphernalia na kalimita suboot na piggamit sa operasyon kan drug den.
Dugang kan opisyal na nagin matrayumpo suboot an operasyon huli man sa tabang kan mga kapulisan asin lokal na gobierno.
Sa presente nasa kustodiya na kan Cawayan MPS an mga naarestadong indibidwal para sa magkakanigong disposisyon.
Mensahe man kan opisyal sa publiko na an saindang ahensya, mga kapulisan asin lokal na gobierno an padagos na magibo nin programa asin lakdang nganing mapoho an mga ilegal na droga sa saindang banwaan.
Pig-engganyar man ni Baquedre an komunidad na ipagtaong aram sainda en kaso may naaaraman na mga indibidwal na imbuelto sa ilegal na aktibidad nganing magibohan ini nin tamang approach asin mapundo na an siring na mga ilegal na gibo.
