LEGAZPI CITY – Sinunspendir na man kan lokal na gobierno kan Pioduran, Albay an klase sa gabos na lebel sa pampubliko asin pribadong mga eskwelahan huli sa huma kan raot nin panahon na presenteng nasa luwas kan Philippine Area of responsibility.
Segun ki Pioduran Municipal Disaster Risk Reduction and Management Office Head Noel Ordoña sa intrevista kan Bombo Radyo Legazpi na amay na ipigpaluwas an nasabing kasuguan nganing matawan nin oras an mga paratukdo na ibugtak an saindang mga teaching materials sa salbadong lugar asin nganing ipreparar an mga eskwelahan bilang kadugangang evacuation center.
Afuera suboot digdi an nakatalaan man sindang makipag-olay sa National Disaster Risk Reduction and Management Council nganing ilatag an mga na-identipikar na vulnerable population asin hazard sa kada barangay kan saindang banwaan.
Pagdoon niya man na huli sa napabaretang magigin kusog asin epekto kan nasabing raot nin panahon, uubuson nindang e-ebakwar an mga residentes na naka-istar sa shoreline nganing malikayan na magkaigwa nin casualty huli sa storm surge.
Pigtaram pa kan opisyal na pira sa saindang mga barangay an naka-eksperyensya na nin pagbabaha sa mga nakalihis na magdamlag huli sa pirang minuto sanang pag-uuran na nagtaong kadifisilan sa publiko asin motorista.
Pigkakarkulo man ninda na maabot sa 1,000 sagkod 2,000 na pamilya o labi pa an maaapektaran enkaso mamatean na sa rehiyon bicol an hagupit kan bagyo.
Paglilinaw niya man na nagpapadagos an operasyon kan saindang pantalan sa presente alagad mapipiritan sindang isuspendi ini urog na kun nakapalaog na sa tropical cyclone wind signal an provincia kan Albay.
Pangapodan ni Ordoña sa publiko na magsunod sa mga abiso kan mga otoridad nganing malikayan na malaag sa alanganin an saindang buhay enkaso mamatean na an epekto kan pigbabantayang bagyo.
