LEGAZPI CITY—Naglatag na nin mitigation plan an Albay Provincial Agriculture Office kasunod kan piglalaomang mamatean na Super El Niño.
Segun sa pahayag ni Albay Provincial Agriculture Office Provincial Agriculturist Daryl John Buenconsejo, makundusir sinda nin El Niño caravan sa mga local government units kun sain saro ining holistic approach kaiba an gobierno provincial kan Albay.
Sa nasabing caravan, bako sana masentro an aktibidad sa sektor kan agrikultura, kundi kabale an sa salud, social services, sa mga hayop, asin iba pang serbisyo na pwedesir itao kan gobierno provincial.
Sinaysay man kan opisyal an saindang mga estratehiya kabale an water resource management urog sa pag-promotir kan conservation kan water resources sa mga paraooma magin sa mga kaharongan.
Pag-implementar kan rotational irrigation scheduling nganing maasigurar an pantay-pantay na water distributions, pag-rehabilitate sa mga existiag irrigation systems siring kan canals, dams asin reservoir; magin pag-establisir nin alternatibong water resources.
Afuera digdi, tinukar man ni Buenconsejo an mapadapit sa climate resilient agricultural practices kun sain pig-engganyar ninda na magtanom nin growth-tolerant and early maturing crop varieties.
Padagos man an pagpapakusog kan nasabing opisina kan early warning advisory systems kaiba an pagdangog sa mga ahensya na nagtatao nin amay na forecast para sa mga paraooma asin parasisira.
