Karsel an bagsak kan sarong lalaking pigkokonsiderang Department of the Interior of Local Government National Most Wanted Person sa kadagatang sakop kan Barangay Poblacion, Rapu-Rapu, Albay.
Segun ki Rapu-Rapu Municipal Police Station Chief of Police Police Major Joseph Melitante sa intrevista kan Bombo Radyo Legazpi na binisto an suspetsado na si alyas “Batista,” 40 anyos, warang agom, sarong parasisira na residente kan Malolos City, Bulacan, alagad nagtago sana sa Barangay Sto. Niño, Bacon District, Sorsogon City.
Nahahampang suboot an suspetsado sa kasong paggadan asin presenteng may patong sa payo o monetary reward na nagkakantidad na P135,000.
Pigdugang pa niya na naarestar an suspetsado sa bisa kan mandamiento de aresto para sa nasambitang kaso kun sain warang ipigbugtak na pyansa para kuta sa saiyang temporamenteng libertad.
Pigtaram pa kan opisyal na an matrayumpong operasyon an naisagibo sa pagtatarabangan kan saindang ofisina, Albay Provincial Intelligence Unit , Albay Provincial Intelligence Team – Regional Intelligence Unit 5, Regional Intelligence Division 5, asin an Regional Mobile Force Battalion.
Sa presente an nasa kustudiya na kan Albay Police Provincial Office an suspetsado asin nakatalaang ihatod sa Malolos City, Bulacan para sa magkakanigong disposisyon.
Pangapodan ni Melitante sa publiko na dae magduwang isip na magdulok sa saindang ofisina nganing isumbong an mga nangyayaring ilegal na gawi sa saindang lugar nganing tulos ining matawan nin aksyon.
