Mawot ni Senate President Pro Tempore Vicente Tito Sotto III na magkaigwa nin malinaw na regulasyon nganing masimbagan an halawig asin dae awtorisadong paghale kan mga senador sa saindang trabaho sa senado.
Ini makalihis na magsangat si Sotto kan Senate Resolution No. 751 na naghahagad sa Senate Committee on Rules na repasuhon an mga eksistidong polisiya asin magrekomendar nin mga lakdang tanganing masimbagan an prolonged unauthorized absences kan mga miembros kan Senado.
Segun sa resolusyon, an pagkapot nin pwesto sa gobyerno sarong dakulang tiwala na itinao kan publiko, kun kaya an mga elehidong opisyal dapat na magin responsable asin maotob nin marhay an saindang mandato.
Sa pagpaliwanag kan nasabing resolusyon, nagigin problema an halawig na pag-absent kan sarong senador huli ta posibleng dae ini makapartisipar sa mga importanteng aktibidad kan senado arog kan pagdebate, pagboto, asin pag-aprobar nin mga importanteng panukalang batas.
Dugang pa, an padagos na pagliban nin sarong miyembro nakakaapektar bako sana sa saiyang trabaho kundi pati na sa kabilogan na operasyon asin kredibilidad kan institusyon.
Sa ngonian, pendiente pa an rekomendasyon kan Committee on Rules basado sa resolusyon ni Sotto tangani na maaraman kun ano an mga bagong polisiya na iimplementar tanganing maseguro na maotob kan lambang senador an saindang mga obligasyon sa taumbayan.
