LEGAZPI CITY – Arestado an tulong indibidwal makalihis madakop na nagdadara nin bako lisensyadong badil asin bala sa Barangay Abaca, Cataingan, Masbate.
Segun ki Cataingan Municipal Police Station Investigator Police Master Sergeant Ranil Inhog sa intrevista kan Bombo Radyo Legazpi na may nakipagkoordinar saindang sarong suldado kan Philippine Army an nagtao nin impormasyon na may kapot an mga ini nin badil mantang nag-iinuman.
Kan mag-responde sinda sa lugar an digdi ninda naabutan an tulong persona asin tulos na inarestar asin binisto na sinda alyas “Noli”, 53 anyos; alyas “Jun”, 19 anyos; asin si alyas “Nel” 21 anyos ns pararehong paraooma asin residente kan nasabing barangay.
Nakuwa suboot sa posisyon ni alyas “Jun” an sarong improvised rifle na kargado kan magasin na may laog na 3 bala na pang-caliber .38.
Pigtaram pa kan imbestigador na nahiling kan mga witness na nagpasiring an tulong suspetsado sa harong kan biktima mantang may mga dara na mga badil ngani kutang takuton kuta ini.
Paglinaw man kan biktima sa saindang hepatura na pigporbaran na badilon ini kan mga suspetsado alagad dae ini nagputok kun kaya nagbago an kakahampangon kan mga suspetsado na hale sa pagbalgar sa Comprehensive Firearms and Ammunition Regulation Act, an masakat ini sa kasong attempted murder.
Susog man sa saindang imbestigasyon nahihiling ninda na matinding dagit an motibo kan suspetsado makalihis nindang napag-araman na nagtugdok an harong kan biktima sa pig-aangkin na daga kan sarong suspetsado.
Pigtaram pa ni Inhog nasa kustodiya na kan saindang hepatura an tulong suspetsado para sa magkakanigong imbestigasyon mantang nakasunad na nin kasong attempted murder an biktima kontra sainda.
