LEGAZPI CITY – Nagsagibo na nin pag-oolay an Provincial Government of Catanduanes mapadapit sa halangkaw na singil kan kuryente.
Segun ki Governor Patrick Azanza sa intrevista kan Bombo Radyo Legazpi na personal siyang nag-atendir sa isinagibong public hearing kan sangguniang panlalawigan huli ta importante an pagdiskutir sa naunambitang orolay.
Dae man niya ipignigar na nag-aabot sa labi 17 pesos an per kilowatt rate na singil sa kuryente sa provincia na saro sa pinakahalangkaw na rate sa enterong nacion kun kaya nagrereklamo na an saindang mga residentes.
Pigtuturo niyang rason sa paghalangkaw sa singil iyo an dakulang utang kan National Power Corporation sa Sunwest Water and Electric Company Inc. (Suweco) na uminabot sa kabangang billiong piso kun kaya binabaan man kan electric company an saindang serbisyo hanggat dae ini nababayadan.
Pigtaram pa kan opisyal na nagkaigwa na nin emergency power supply agreement an First Catanduanes Electric Cooperative Inc (FICELCO) asin Suweco nganing magdistribwer nin kuryente sa saindang lugar.
Napag-araman man sa ginibong hearing na 10 taon nang naghahalat an Suweco na aprubahan sinda na magsupply nin kureyente gamit an solar o hydro energy alagad dae ini naisasakatupadan.
Nagluluwas man suboot na politically motivated an nagigin ugat kan problema kan provincia pag-abot sa kuryente kun kaya bako na ini katanggap-tanggap asin dapat nang magibuhan nin aksyon
Pagdoon pa ni Governor Azanza na pighahagad kan mga residente na magkaigwa nin temporamenteng pagpapapundo sa dagdag singil sa kuryente alagad basado sa pinakahuring billing an nakasabay na ini asin warang sinabi an Suweco na ipapapundo ini.
