Nanindugan si Julie Patidongan o alyas “Totoy” sa saiyang ibinuyagyag asin nagsayumang maghagad nin despensa ki retired Police Lieutenant General Jonnel Estomo na iniba niya sa kaso kan mga nawawarang sabungero.
Magigoromdomang sa sarong conference sa National Police Commission kan Hulyo 14 sinabi ni Patidongan na kaiba suboot si Estomo sa pig-aapod na “Alpha Group” na nasa likod kan gambling operations kan negosyanteng si Atong Ang.
Si Patidongan an dating tawuhan ni Ang na nagbuyagyag na ini an mastermind suboot sa mga nawawarang sabungero.
Kasunod kaini inagyat ni Patidongan si Estoma na magpa-lie detector test.
Mientrastanto, nakatalaan suboot na magsunad si Patidongan kan sinumpaang salaysay sa masunod na semana kun saen pormal niyang papangaranan si Estomo asin iba pang miyembro kan “Alpha Group”.
Naenot nang sinabi ni Estomo na susunadan niya nin kaso si alyas “Totoy” kun dae kaini babawion an pahayag na nagtatakod saiya sa kaso kan mga nawawarang sabungero.
Inengganyar man ni Estomo si alyas “Totoy” na mag-isyu nin public apology saiya.
