LEGAZPI CITY-Inanunsyo ni Finance Secretary Ralph Recto na posibleng makabalik an subsidiya kan gobierno sa PhilHealth sa taong 2026, makalihis ining tanggalan nin dagdag na pondo ngonian na taon.
Segun kay Recto, P53.26 bilyon an ipigkondusir na subsidiya para sa PhilHealth sa masunod na taon, na mas hababa nin 28.44% kumpara sa P74.43 bilyon kan nakaaging taon para sa 2025, na tulos hinali kan Bicameral Conference Committee makalihis na mahilingan nin P280.575 bilyon na reserve fund an nasambitang departamento.
Sa presente, uminabot na sa P145.36 bilyon an nabayadan kan PhilHealth sa benefit claims poon kan Hunyo na haros doble kumpara sa P76.89 bilyon kan parehong panahon kan nakaaging taon.
Afuera sa zero subsidy, pigsierto ni Fund Management Sector Senior Vice Renato Limsiaco Jr. na kaya man giraray kan PhilHealth na pondohan an mas mahiwas na benepisyo kaini na piglalaoman na maabot sa P348 bilyon an pondo kan PhilHealth sa pagtatapos kan taong 2025.
Dagdag pa ni Recto, papakusugon kan pamahalaan an serbisyong pangsalud asin an mga ospital kan Department of Health (DOH), orog na sa mga probinsya kung sain kulang pa an mga ospital.
Obheto man suboot kan pamahalaan an zero-balance billing, kairiba sa mga specialty hospitals.
Nilinaw man ni Recto na warang planong taasan an kontribusyon kan mga miyembro sa PhilHealth sa masunod na taon.
Magigirumduman na pigtugon kan Department of Finance (DOF) an PhilHealth na ilipat an P89.9 bilyon sa National Treasury, huli sa nakalampas sa P500 bilyon an saindang reserve fund.
Alagad, makalihis na magin kontrobersiya hale sa malain-lain na sektor asin an Temporary Restraining Order (TRO) hale sa Korte Suprema, P60 bilyon pa sana an naililipat kan nasambitang departamento.
