LEGAZPI CITY-Naghayag nin pagkahandal an mga top diplomat kan Quad sa naglala na sitwasyon sa West Philippine Sea asin South China Sea huli sa suboot padagos na aggresyon na nangyayari sa mga nasambitang kadagatan.
Liwat sa dai man direktang pinangaranan an nacion na nagsasagibo kaini, pigsaro-saro kan mga top diplomat an nagkapira sa mga mapang-agyat na aksiyon na nangyayari sa duwang katubigan siring kan pakikiaram sa mga offshore development na ginigibo kan mga saradit na nacion asin an pagpugol sa mga barko kan ibang nacion na nasa kadagatan, na sarig sa itinalaan na freedom of navigation asin overflight.
Tinatsaran man kan grupo an peligro na maniobra na padagos na pigsasagibo kan mga military arcraft, mga coast guard asin militia vessel, hale sa pirming paggamit kan water cannon laban sa ibang barko hast sa mga serye kan ramming incident asin biglaang pagulang sa mga naglalayag na barko.
Ikinahahandal man kan grupo na an gabos na ini parte kan nagyayaring militarisasyon sa mga nasambitang kadagatan.
Tinawan doon man kan grupo an importansya kan pagpapaotob kan United Nations Convention on the Law of the Sea (UNCLOS) ngani mapakusog asin mamantenir an kapayapaan sa West Philippine Sea asin East China Sea.
Naghayag man nin suporta an Quad ministers sa pagresolbar sa mga maritime dispute sa pagultanan kan mga nacion na nagaagi sa mga nasambitang kadagatan, sa matoninong na paagi basado sa mga itinalaan kan international law.
Kan enot na aldaw kan Hulyo, nagsagibo nin pagorolay an mga Quad top diplomat sa Estados Unidos asin an sitwasyon sa West Philippine Sea asin East China Sea an saro sa enot na pinagorolayan.
Naghayag man nin pagsuporta an grupo sa piglalaoman kan Association of Southeast Asian Nations na ipagkasaro an mga miyembro kaini, kairiba na an iba pang regional organization siring kan Pacific Islands Forum, Indian Ocean Rim Association asin iba pa.
