Pinaglalaoman na magiging magayon asin maaabot an antas kan produksyon kan nakalihis na taon sa pag-aani nin paroy hasta sa Oktubre asin Nobyembre.
Segun ki Samahang Industriya ng Agrikultura Chairman Engr. Rosendo So na alagad magayon an presenteng ani, dae pa marhay namamatean an matinding tagmara na dara kan Super El Niño, na posibleng tumama sa masunod na cropping season puon Nobyembre hasta Marso.
Huli digdi, pinayuhan kan SINAG an mga paraoma na warang bastanteng irigasyon na magtanom na muna nin mga high-value crops ngani na mabawasan an posibleng pagkalugi sa saindang kabuhayan.
Ipigduon man si So an importansya kan pagtatao nin fuel subsidy antes pa man magpuon an panibagong planting season ngani na magamit tulos ini sa pangangaipuhan sa omahan.
Nagtetenir na susi an maagap na preparasyon asin napapanahong suporta kan gobierno ngani na mamantenir an pusog na produksyon nin pagkaon sa tahaw kan huma kan El Niño.
