LEGAZPI CITY-Itinaas na sa Blue Alert an alert status kan Department of Social Welfare and Development (DSWD) huli sa peligro kan mga pag-uran na dara kan low pressure area (LPA) asin tropical depression na nakaka-apektar sa manlain-lain na parte kan nacion.
Enot nang nagtaas sa White Alert status sa nasambitang ahenisya kasunod kan mga serye nin paguuran sa mga nakaaging aldaw.
Katakod digdi an mahiwas na paghahanda kan Disaster Response Command Center (DRCC) kan nasambitang ahensiya ngani magin makaskas asin maipaabot an tabang sa mga posibleng maaapektaran kan kalamidad.
Sa sarong pahayag, ipinaluwas ahensiya, na pigsisierto ninda an pagbabantay sa kondisyon kan mga residente na enot na naapektaran nin mga serye kan paguuran.
Sa presente, igwa man nin 3 milyon na family food packs na nakahanda na ipanao sa mga pwedisir n amaapektaran sa kalamidad, mantang nagpapadagos an repacking asin repositioning sa iba pang supplies.
Basado sa huring datos kan state weather bureau, an LPA na nasa hilagang silangan kan Tuguegarao City, padagos na nagpapa-uran sa kadakol na lugar sa bilog na nacion.
