LEGAZPI CITY-Nadukayan kan mga otoridad an malipot na bangkay kan sarong law student kan De La Salle University sa Naic, Cavite kan nakaaging aldaw.
Binisto an biktima na si Anthony Granada, 25-anyos asin nakatenir sa ciudad kan Taguig, na nawawara poon pa kan nakaaging semana.
Basado sa inisyal na report kan Taguig City Police, huring nahiling an estudyante na nakalunad sa behikulo pasiring sa Naic Town Plaza.
Sa kuha kan CCTV hale sa Lopez Jaena Bridge area kan Hunyo 17, nahiling an biktima na solo na naglalakaw pasado alas 9:20 nin banggi asin kan Sabado, Hunyo 28, nadukayan ini na warang buhay sa bakanteng lote sa Baranggay Sapa, Naic, Cavite.
Segun sa mga otoridad, nasa advanced state of decomposition an bangkay kan makua sa bakanteng lote.
Sa presente, nagpapadagos an imbestigasyon kan mga otoridad sa kaso mantang naghahagad nin privacy sa publiko an pamilya kan biktima.
