LEGAZPI CITY – Karsel an bagsak kan sarong persona makalihis madakop sa isinagibong buy bust operation sa Barangay Maroroy, Daraga, Albay.
Segun ki Daraga Municipal Police Station Chief of Police Police Lieutenant Colonel Edgar Azotea sa intrevista kan Bombo Radyo Legazpi na nagin matrayumpo an operasyon huli sa pakikipagtabangan ninda sa Philippine Drug Enforcement Agency Regional Office V.
Binisto an suspetsado na si alyas “PAT”, 46 anyos, warang trabaho asin residente kan Barangay Sipi kan kaparehong banwaan asin provincia.
Nakuwa sa suspetsado an onseng sachet na kan pigtutubudang shabu na may timbang na 51 grams asin pigkakarkulong nagkakantidad nin P346,800.
Pigtaram pa kan opisyal na kabale an suspetsado sa listahan kan mga Street Level Individual na pigmamanmanan kan mga otoridad asin dati nang nakulong huli sa parehong kaso
Patanid niya sa mga naggigibo nin ilegal na gawi na dae mapundo an polisya sa pagsawata sa sainda asin nganing dae na makapandamay pa nin iba .
Sa presente, nahahampang an suspetsado sa kasong pagbayolar sa Acta Republica numerado 9165 o Comprehensive Dangerous Drugs Act of 2002.
Labi man an pasasalamat ni Azotea sa mga barangay sa saindang banwaan huli sa marikas na koordinasyon enkasong may nanotaran sindang maraot na elemento nganing tulos ining natatawan nin magkakanigong aksyon.
