LEGAZPI CITY – Pigheras kan sarong Public Safety Enforcer kan San Jacinto, Masbate an saiyang buhay asin paghihirap bago makapasar sa Licensure Examination for Teachers.
Segun ki Jovic Ogahayaon Saplot sa intrevista kan Bombo Radyo Legazpi na maugma ini huli ta nakapasar siya maski difisil an saiyang inagihan bago mag-take kan nasabing exam.
Aminado siya na mapagal na pagsabayon an trabaho asin pag self review alagad dae suboot ini nagin hadlang para sa saiyang pangarap na magin paratukdo.
Paghistorya niya pa na sa amay pa sanang edad, siya na an nagtindog bilang padre de pamilya poon kan mamaaram an saindang ama asin mas pinili niyang magpundo muna sa pagklase nganing mapatapos niya an saiyang mga tugang mantang 18 anyos na siya kan makatapos man sa elementarya.
Pigtaram pa kaini na naghingoa siya na makapagtapos asin makapasar sa exam nganing makakuwa nin permanenteng trabaho asin dae na suboot ma-eksperyensya liwat an kadifisilan kan buhay.
Maski ano-ano suboot na trabaho an saiyang piglaugan arug kan pagigin kargador, helper, collector, asin pag-aani nin mais nganing magkaigwa siya nin pangpa-adal sa saiyang tugang.
Dae man nagin madali an saiyang trayumpo huli sa diskriminasyon na saindang naresibi alagad dae ini nagin rason nganing magpundo siya sa pag-abot kan saiyang pangarap.
Sa presente, mawot ni Saplot na magtukdo sa pampublikong eskwelahan asin maiheras an inspirasyon sa mga estudyanteng nangangarap man na maguno an trayumpo sa ibong kan kahirapan.
