LEGAZPI CITY – Puga puga na an preparasyon kan mga delegado kan rehiyon Bicol para sa pagpopoon kan Palarong Pambansa 2025.
Segun ki Department of Education Legazpi City Division Sports Officer Dexter Sison sa intrevista kan Bombo Radyo Legazpi na padagos man an familarization kan mga athletes sa mga playing venue nganing dae sinda manibaguhan sa oras na magpoon na saindang mga kawat.
Tulos man natatawan nin aksyon an mga problema na saindang pigkakahampang arug kan tubig asin kuryente huli sa marikas na koordinasyon kan mga school faculty sa mga biletting center kan rehiyon.
Preparado na sinda sa gigibuhong opening ceremony ngonian na aldaw asin piglalaoman ninda na magigin mahigpit an seguridad huli sa pag-atendir ni Presidente Bongbong Marcos asin ni Education Secretary Angara.
Pigtaram pa kan opisyal na mapoon man an opening program mga bandang hapon huli sa labing init na maeeksperyensyahan sa Laoag, Ilocos Norte.
May mga narentahan na man sindang 25 jeepneys nganing magakigwa nin mga masasakayan pasiring sa mga playing venues na hararayo sa saindang biletting centers.
May mga nakipagkoordinar na man saindang mga government official sa rehiyon na mawot mag-atendir kan opening ceremony alagad wara pa siyang impormasyon kun may nagkompirmar na sa mga ini.
Pigtawan doon man ni Sison na kun dae man ninda makuwa an halangkaw na pwesto sa national meet, mawot nindang makakuwa nin magayon na eksperyensya an saindang mga atleta na babalunon ninda na minsan na sindang nagrepresentar kan rehiyon Bicol.
