LEGAZPI CITY—Nakabandera na sa blue alert status an Office of the Civil Defense-Bicol para sa nagdadangadang na eleksyon sa Lunes, Mayo 12.
Segun ki Office of the Civil Defense-Bicol Spokesperson Gremil Naz, sa intrevista kan Bombo Radyo Legazpi, na naka-24/7 an saindang operation center en kaso magkaigwa nin insidente nin natural hazards siring kan pagputok nin bulkan, linog, asin iba pa.
Segun saiya na igwa an saindang mga personahes na makoordinar asin mangengenot sa pagresponde sa mga siring na insidente.
Dugang kan opisyal, padagos man an pag-monitor kan saindang ahensya asin Sorsogon Provincial Disaster Risk Reduction and Management Council en kaso magkaigwa nin phreatic eruption an bulkang Bulusan sa katahawan kan eleksyon.
Mientrastanto, pagiromdom man ni Naz sa mga botante na pirmeng i-save an numero kan operating center kan saindang munisipalidad o ciudad na pwedesir ikontak en kaso may emerhensya nganing tulos man ining marespondehan kan mga otoridad.
