LEGAZPI CITY—Maabot sa 851 na klasrum sa mga eskwelahan sa probinsya kan Albay an gagamiton bilang polling precincts para sa National and Local Elections sa Lunes, Mayo 12, 2025.
Segun ki Schools Division Office Albay Spokesperson Froilan Tena, sa intrevista kan Bombo Radyo Legazpi, na nainspeksyon na an mga nasabing klasrum bago pa man mag-abot an automated counting machines (ACM) gikan sa Commission on Elections (COMELEC).
Kalimitan sa mga pigche-check sa mga eskwelahan an suplay kan kuryente, asin an kondisyon kan mga tukawan asin lamesa.
Dugang pa ni Tena, na igwang 413 na non-teaching personnel asin 223 personahes na gikan sa DepEd Albay an maserbi sa eleksyon.
Nagbilog na man an saindang opisina nin sarong task force ngani na mag-monitor asin i-report sa Regional asin Central Office an sitwasyon na may kinaaraman sa pirilian, kun saen mapuon ini sa Mayo 11 sagkod Mayo 13.
Sa presente, wara pa man na nairerehistong mga reklamo mapadapit sa mga paratukdong maserbi sa mga polling precincts.
Pagiromdom man kan opisyal na magboto nin wais, pilion an mga kandidatong makakatabang sa sektor kan edukasyon asin warang maraot na motibo nganing magin maayos an pag-adal kan mga kajovenesan.
