LEGAZPI CITY – Gadan an sarong ina makalihis pagsasaksakon kan saiyang aki sa Barangay Matanag, Legazpi City.
Segun ki Legazpi City Police Station spokesperson Police Executive Master Sergeant Carlos Paña sa intrevista kan Bombo Radyo Legazpi na nagtitinda nin gulay sa Legazpi City Public Market an 60 anyos na biktima.
Basado sa saindang imbestigasyon na mantang nagpe-preparar an ina kan saiyang ititinda sa merkado an biglang nagimata an 26 anyos na aki kaini asin kinuwa suboot kaini an kutsilyo asin ginamit nganing pagsasaksakon sa manlain-laing parte kan hawak an saiyang ina.
Nakipag-agawan man an suspek sa 22 anyos na tugang kaini kan magsaklolo makalihis madangog an paghagad nin tabang kan saindang ina.
Pigtaram pa kan opisyal na pigporbaran pa kutang darahon sa hospital an biktima kan mga nagrespondeng pulis alagad dae na ini nag-abot nin buhay.
Makalihis an sarong aldaw an tulos man na nadakop an suspetsado huli ta pig-enganyar magsuko kan mga kamidbid kaini.
Pigdoon pa ni Paña na hasta sa ngonian an nagtetenir na misteryo an motibo kun ngata nagibo kan aki an karumal-dumal na krimen sa saiyang ina.
Sa presente nagtetenir an suspetsado sa kostudiya kan Legazpi City Police Station asin nakasuhan na nin parricide.
