LEGAZPI CITY – Matrayumpong na-ilansar sa Baras, Catanduanes an Kabataan Kontra Kriminalidad na pinangenotan kan mga kapulisan.
Segun ki Baras Municipal Police Station Chief of Police, Police Captain Brenda Hate sa intrevista kan Bombo Radyo Legazpi na nag-atendir sa nasabing launching an labi 300 na mga jovenes na gikan sa manlain-laing barangay kan saindang banwaan.
Patunay suboot ini na aktibo an mga ka-jovenesan na magpartisipar nganing magtabang sa kampanya kan mga otoridad sa saindang lugar.
Kompwesto an nasabing numero nin mga Sangguniang Kabataan Officials, mga church group asin iba pang mga youth groups siring man an manlain-laing ahensya.
Pigtaram pa kaini na afuera sa paglansar kan nasabing programa, pigtukduan man an mga ka-jovenesan mapadapit sa Comelec kontra bigay, cyberlaws, cyberbullying asin iba pang krimen na pwedesir ka-imbweltuhan kan mga ini.
Importante suboot an partisipasyon kan mga kabataan sa pagpapa-otob nin pazy orden sa Baras huli ta sinda an magigin kasangga, mata, asin talinga kan saindang mga barangay kun sain sinda an enot na makakapagtao nin impormasyon sa saindang opisina.
Pig-enganyar ni Hate an iba pang mga youth na makisumaro sa mga programa kan mga kapulisan huli ta saro sa mga obheto kaini an mapaotob an pazy orden asin an kaligtasan sa banwaan nin Baras.
