LEGAZPI CITY- Inihayag kan sarong constitutional law expert na warang anuman na legal effect an plano kan mga lehislador na pagdeklarar na persona non grata ki Chinese Ambassador Jing Quan.
Sa ibong kaini, posibleng igwang makusog na political effect an nasabing lakdang.
Paliwanag ni Atty. Michael Henry Yusingco sa intrevista kan Bombo Radyo Legazpi na solamentang an presidente sana an igwang poder na magpatalsik sa sarong diplomat.
Aminado man ini na an presenteng mga kaganapan an posibleng magresulta na naman sa pagka-atrasado kan mga diplomatic talks sa pagresolbar sa mga isyu sa West Philippine Sea.
Dae man pighahali ni Yusingco an posibilidad na samantalahon kan Beijing an mga nangyayari sa presente para sa saindang sadiring kapakanan asin gamiton sa sadiring naratibo.
Mientras tanto, tinuyaw man kan nasabing constitutional law expert an mga lehislador sa Pilipinas na suboot ‘nagtatapangtapangan’ asin nagsasagin sagin na makabansa, alagad padagos na pigbabawasan an alokasyon para sa modernisasyon kan Armed Forces of the Philippines, na para kuta sa pagdepensar sa nacion.
Dagdag pa kaini na an mga lehislador an dapat na puntiryahon huli ta nasa kamot kan mga ini an pondo na para sa pagpapa-uswag kan kakayanan kan nacion na depensaran an teritoryo.
