LEGAZPI CITY—Gadan an sarong 19-anyos na lalaking estudyante makalihis na malamos ini sa Agoho Beach sa Purok 8, Barangay Jonop, sa banwaan kan Malinao, provincia kan Albay.
Segun ki Malinao PNP Investigator on Case, Police Staff Sergeant Jeremy John Onrubia, sa intrevista kan Bombo Radyo Legazpi, tulos nindang nirespondehan an insidente kairiba an Municipal Disaster Risk Reduction and Management Office (MDRRMO), asin Bureau of Fire Protection.
Susog sa inisyal na imbestigasyon, na an biktima kaiba an saiyang pag-iriba an nagkasurundo na magpasiring sa Agoho ngani na magkararigos.
An mga nasabing kajovenesan an gikan sa ciudad kan Ligao, kan kaparehong provincia.
Sinabi kan opisyal na mantang yaon sa hibabaw na parte kan kadagatan an grupo kan biktima, nagkusog an hukol asin pigbubutong na suboot an grupo pasiring sa tahaw kan kadagatan.
Dae aram kan mga ini na pahirarom nang pahirarom na an saindang natitimakan hanggang sa dae na sinda makabalik sa hibabaw na parte kan kadagatan.
Ini nagresulta sa pagkakataranta kan nasambitang grupo.
Dugang ni PSSG Onrubia, napag-araman man na dae tatao maglangoy an mga ini.
Namanaher kan duwang persona sa grupo na makabalik sa may hibabaw na parte kan baybayon.
Mantang an duwa pang pag-iriba an napaharayo na sa hibabaw na parte kan kadagatan asin an saro digdi an nailigtas kan parasisira.
Alagad an biktima an napasiring na sa hararom na parte kan kadagatan resulta kun nata ini naglubog asin nawara.
Makalihis an nagkapirang minuto nahiling an biktima kan ibang concerned citizens na nagtabang man sa paghahanap kairiba an Philippine Coast Guard.
Tulos man nagsagibo an Philippine Coast Guard nin Cardiopulmonary resuscitation (CPR) sa biktima ngani na mai-revive ini.
Dinara an biktima asin saiyang pag-iriba sa hospital para sa atensyong medikal alagad an 19-anyos na lalaki an dae na naisalbar pa.
Mientrastanto, nagpagiromdom man si Onrubia sa publiko na mag-doble ingat urog na sa mga lugar na dae kabisado.
