LEGAZPI CITY—Ipighayag kan Bureau of Fire Protection Legazpi na tapos na nindang iinspeksyon an mga billeting areas asin playing venues na gagamiton para sa Palarong Bicol 2025 na ikukundusir sa Legazpi City, Albay.
Segun ki BFP Legazpi Deputy Fire Marshal SFO4 Gary Santander, sa intrevista kan Bombo Radyo Legazpi, may findings sinda sa mga ginibong inspeksyon alagad minor man sana an mga ini na kaya man soboot na ikomple kan mga eskwelahan bago pa man mag-abot an mga delegado gikan sa manlaen-laen na lugar sa Bicol.
Sa naunambitang inspeksyon may nareparo sinda orog na sa mga electrical systems kun saen may nagkapirang eskwelahan an igwang dangling wirings, fire alarms na naka-install alagad bako na functional, asin iba pa.
Sinabi man kaini na dapat igwang nakabugtak na fire extinguishers para na man sa fire safety.
An mga nasambitang findings sainda naman na ipigpaabot sa mga eskwelahan kun saen dapat ining makomple bago pa man magpoon an Palarong Bicol.
Pigrekomendar man kan saindang opisina na dapat an kada klasrum an igwa sanang sampulong katawo, siring man na dapat accessible an mga exit sa kada klasrum.
Pig-require man na dapat igwa nin emergency lights orog na sa mga hagdanan nganing en kaso man na mawaran nin kuryente, maliwanag man giraray an agihan kan mga ini.
Mientrastanto, nangapudan an opisyal sa mga delegado, eskwelahan, asin ahensya na mapartisipar sa nasambit na Palaro na magtarabangan ngani na maitawid an okasyon asin dae magkaigwa nin ano man na insidente nin kasulo.
