LEGAZPI CITY—Dikit pang mahabunan kan dae pa nabibistong persona an sarong convenience store sa parte kan Ilawod, Daraga, Albay.
Segun ki Daraga Municipal Police Station Officer in Charge Police Lieutenant Colonel Maria Rosario Calusor, sa intrevista kan Bombo Radyo Legazpi, posible suboot na nabulagbog an parahabon makalihis na mag-alarm an nasabing convenience store.
Tulos na na-inform an main office kaini sa Naga City na igwang nakalaog na persona sa establishimiento asin pighihiro an CCTV sa laog kaini.
Dugang kan opisyal na wara man na nakuang anumang gamit an suspek huli sa an target kaini an safety vault kan convenience store kun sain ginamitan nin mechanical tools asin butane torch.
Alagad huli sa matibay an safety vault dae ini nabukasan kan suspek.
Sa ngunyan pighahalat pa ninda an nakua kan information technology kan nasabing establishimiento sa pagkakakilanlan kan suspek. Siring man an pagkuang CCTV footages sa mga kataning kaining mga establishimiento.
Pagiromdom ni Calusor sa mga business owners na importante an CCTV camera sa saindang establishimiento urog na sa pag-obserbar kan security measures.
