LEGAZPI CITY- Inaksyunan kan mga otoridad an nairehistrong nasa apat na insidente nin pagrasay nin daga sa banwaan kan Baras, Catanduanes.
Partikular sa mga ini an pagrasay nin daga sa mga Barangay Benticayan, Putsan, Genitligan, asin Tilod.
Segun ki Baras Municipal Disaster Risk Reduction and Management Office head Engineer Khalil Tapia sa intrevista kan Bombo Radyo Legazpi na tulong insidente an minor landslides asin sarong mayor na landslide an nairehistro pasiring sa banwaan kan Gigmoto.
Napag-araman na na-clear na man an nasabing mga landslides makalihis an paramientras na pagigin impassable kan nagkapirang tinampo.
Sa ibong kaini, padagos na pigpapalikay kan mga otoridad an publiko asin mga motorista huli ta nagtetenir na mahalnas an mga dalan.
Sinabi kan opisyal na maski pa holiday season, padagos na naka standby asin naka alerto an saindang opisina asin mga personahe ngani na magresponde sa anuman na insidente.
