LEGAZPI CITY—Sarong 84-anyos na lalaki an nadukayang wara na nin buhay sa kabulodang parte kan Comon sa ciudad kan Tabaco, Albay.
Segun ki Tabaco CPS PIO Police Staff Sergeant Elaine Adriano, sa intrevista kan Bombo Radyo Legazpi, na kan Enero 28, nag-report an aki kan biktima mapadapit sa pagkawara kan saiyang ama na si alyas “Pastor” na residente kan Barangay Mariroc kan nasambitang ciudad.
Dugang kaini na an huring paghali sa harong kan biktima alas-10 nin pagkaaga kan Enero 27 alagad dae na ini nakabalik pa.
Huli digdi nakipagkoordinar an saindang opisina sa mga kataid na lugar magin sa mga barangay officials kan Comon asin Mariroc para mahanap an biktima.
Pigtaram kan opisyal na an kapitan kan Barangay Mariroc naghagad man nin tabang sa Tabaco City Disaster Risk Reduction and Management Office.
Kan nakaaging aldaw nadukayan an lawas kan biktima sa pamitisan kan bangin sa may kabulodang parte kan Purok 7, Barangay Comon kan naunambitang ciudad.
Susog sa pahayag kan pamilya kan biktima na an huring pagbisita kaini sa saindang farm—sampulong taon na an nakakalihis, kaya may posibilidad na nawara ini sa lugar, asin dugang na man an pagbabawal ninda sa biktima na magpasiring sa saindang farm huli na man kan saiyang edad asin pisikal na kondisyon.
Posible man na saro pang pigtuturong rason iyo an mga pag-uuran na naeeksperyensyahan sa lugar na posibleng ikinahalnas kan biktima pasisiring sa saindang farm.
Napag-araman man na dae ini nagpaaram sa saiyang pamilya na maduman ini sa saindang farm huli ta pupugolan siya kan saiyang mga aki.
Mientrastanto, abiso man ni Adriano sa publiko na pagmangnohon an mga pag-iriba sa harong lalo na an mga may edad na para maibitaran an siring na insidente.
