LEGAZPI CITY – Masasabi kan sarong political analyst na natatawan nang linaw kun siisay an mga opisyal kan gobierno an may partisipasyon sa mga maanomalyang flood control projects makalihis an ikalimang pagdangog kan Senate Blue Ribbon Committee.
Segun ki Bicol University-Political Science Department and Far Eastern University Prof. Amr Solon Sison sa intrevista kan Bombo Radyo Legazpi na detalyado man an pagkanta o pagtuga kan duwang dating district engineer kan Department of Public Works and Highways Bulacan siring man an mga ladawan na ipigheras ni Senate Pro Tempore Ping Lacson na magpapatunay sa mga pagka-imbwelto kan mga pig-aakusaran afuera na sana kun babaligtadon an mga ini.
Madepende na suboot sa government agencies an mangyayari sa pagpapa-uli ki Ako Bicol Rep. Elizaldy Co alagad nanindugan ini na dapat umuli an mambabatas sa ibong kan dae man pigkwestyon an saiyang rason na medical leave.
Huli ta wara pang opisyal na kasong ipigsusunad sa naunambitang mambabatas, sa hiling niya an mahahampang ini sa disciplinary action sa House of Representatives asin pigtutubudan na hampangon asin magsa-irarom sa due process.
Pigtaram pa kan naunambitang political analyst na dapat hampangon ni Rep. Co an mga alegasyong pig-aakusar saiya maski mag-atendir ini sa paagi kan virtual meeting nganing madangog an saiyang lado.
Pwedesir man suboot na nagsunad nin ethics complaint si Navotas Representative Toby Tiangco laban ki Rep. Co nganing mapressure ining magpahiling asin simbagon an ipiggagapong akusasyon urog nang wara ining naisumite na medical form.
Posible man na maka-apektar sa political narrative kan mga Albayano an pagkaka-imbwelto kan mambabatas sa anomalya siring man na apektado an saindang political clan sa provincia kan Albay asin an saindang partylist na Ako Bicol na pwedesir magamit kan saindang kalaban sa pagpapakusog kan saindang pangaran o grupo.
Pagdoon pa ni Sison na dapat ipressure kan namamanwaan an gobierno na magtrabaho nin maray para sa nacion huli ta ini an saindang direchos bilang pilipino kun kaya dapat manimbag asin hampangon an pagkakasala kan mga imbweltong opisyal.
