LEGAZPI CITY—Arestado an duwang indibidwal kaiba an pigkokonsiderar na Regional Drug Target Listed personality sa ikinundusir na drug buy-bust operation kan mga otoridad sa Barangay Quibongbongan, Guinobatan, Albay.
Segun ki Philippine Drug Enforcement Agency Bicol Public Information Officer Carlo Fernandez, sa intrevista kan Bombo Radyo Legazpi, binisto an suspek na sarong notorious drug personality na si alyas “Bern”, 56-anyos, residente kan nasambitang lugar, mantang pigbisto man an kaiba kaini na si alyas “Lon.”
Naarestar an mga ini sa pinagsarong operatiba kan PDEA 5 Regional Enforcement Team, PDEA 5 Regional Intelligence Investigation Service, PDEA Albay Provincial Office, Guinobatan Municipal Police Station, asin Philippine National Police-Philippine Drug Enforcement Group Special Operations Unit 5.
Sinabi ni Fernandez na an suspek bako sana nakikipagtransaksyon nin ilegal na droga sa banwaan kan Guinobatan kundi naglilibot man ini sa iba pang parte kan rehiyong Bicol.
Nakumpiskar sa suspek an maabot sa 10 gramos na pigtutubudang shabu na may kantidad na P68,000.
Mientrastanto, mahahampang an mga ini sa pagbayolar sa Anti-Drug Law.
