LEGAZPI CITY — Tulos na naghagad nin dispensa an duwang foreign scientists na nasita kan mga otoridad makalihis maglaog sa danger zones kan nag-aalburutong bulkang Mayon.
Nabisto an mga ini na sinda Kristoff Andermann, sarong German scientist asin kaibanan na si Kristine Hook, sarong American scientist.
Sa ekslusibong intrevista kan Bombo Radyo Legazpi kay Pol. S/Insp. Genevieve Oserin, hepe kan Sto. Domingo Municipal Police, nagsasagibo nin pagpapatrolya sa chokepoints sa Brgy. Lidong an mga otoridad kan mahiling an duwa na nagpapalayog nin drone sa laog kan 6-kilometer Permanent Danger Zone asin 7-kilometer Extended Danger Zone.
Pag-eksplikar man kan duwan, naghagad sinda nin permiso sa Philippine Institute of Volcanology and Seismology (Phivolcs) ngani na makatabang sa pagkua nin data sa nagpapadagos na monitoring kan bulkan.
Mientrastanto, kinumpirmar man ni Phivolcs Dir. Renato Solidum na tinawan nin permit an mga ini alagad pigduon na hasta sana sa buffer zone o nasa 8-kilometers EDZ.
Aminado man an opisyal na warang proper coordination an Phivolcs sa pagtugot sa nasambitan na pag-aadal sa local government units urog na sa pulisya kaya hagad kaini an pakikipag koordinar ngani na masierto kan kapulisan na dae na mauutro an kaparehong insidente.
