LEGAZPI CITY—Arestado an sarong 18-anyos na lalaki makalihis an ikinundusir na buy-bust operation sa Barangay Ponso, Polangui, Albay.
Segun ki Polangui Municipal Police Station Deputy Chief of Police Police Lieutenant Antonio Mayor Jadie IV, sa intrevista kan Bombo Radyo Legazpi, binisto an suspek na si alyas “Nyong”, warang agom, asin residente kan Barangay Herrera, Ligao City.
Naarestar ini sa pinagsarong operatiba kan Polangui Municipal Police Station, Provincial Intelligence Unit asin Philippine Drug Enforcement Agency (PDEA) Albay.
Nakumpiskar sa suspek an duwang pidaso nin heat sealed transparent plastic sachet na may laog na pigtutubudang shabu asin may kantidad na labi P10,200.
Afuera digdi, narekober man an buy-bust money na P3,000 asin sarong cellular phone.
Sa presente, an mga ebidensiya asin an suspek an nasa kustodiya na kan kapulisan para sa magkakanigong disposisyon.
Mahahampang ini sa kasong pagbalgar sa Republic Act No. 9165 o Comprehensive Dangerous Drugs Act of 2002.
