LEGAZPI CITY—Marikas na inaksyunan kan Albay Philippine National Police an pag-imbestigar sa nangyaring panghahabon sa mga kagamitan kan Philippine Institute of Volcanology and Seismology Ligao Observation Station sa Ligao City.
Magigiromdoman na hinabon kan dae pa nabibistong indibidwal sa nasabing station an six meters solar cables, three meters battery cables, five meters liquid-tight conduit cables asin iba pa na nagtatao nin supply nin kuryente asin real-time volcano monitoring data communications na kaipiuhan sa pag-monitor kan bulkang Mayon.
Segun ki Albay Police Provincial Office Provincial Director Police Colonel Noel Nuñez, sa intrevista kan Bombo Radyo Legazpi, sa ngunyan pigkukua na ninda an mga detalye asin pig-check na an CCTV footages sa lugar.
Dugang niya na nagsasagibo na man nin pag-ronda digdi asin backtracking nganing maaydentipikar an mga posibleng suspek sa nangyaring insidente.
Mensahe man ni Nuñez sa nasabing opisina na preparado sinda magtao nin seguridad huli sa importante na pigprotehiran an mga govenment properties; abiso man niya sa publiko na kun sisay man an may impormasyon sa insidente an tulos man na makipagkoordinar sainda nganing maresolbaran ini.
