LEGAZPI CITY—Dakulang agyat ngunyan sa mga nagkapirang evacuees kan Barangay Calbayog, Malilipot na presenteng nagtitinir sa tent shelters sa Barangay San Jose kan kaparehong banwaan an namamatean na mainit na panahon makalihis na sinda iebakwar huli kan padagos na pag-alburoto kan Bulkang Mayon.
Segun ki Punong Barangay Gilbert Bolaños kan Barangay Calbayog, Malilipot, sa intrevista kan Bombo Radyo Legazpi, huli kaini ipigsuhestyon ninda sa mga evacuees na may mga kaparientes sa Barangay San Jose asin iba pang kataning na barangay na digid muna magtinir ganing dae labing magsapar sa labing init kan panahon.
Dugang niya na sa presente kadakol man an nanutaran na halangkaw an blood pressure kan pirang evacuees, asin sa ngunyan an ipigproseso na ninda an lakdang nganing makapagpadara nin suplay nin bulong sa evacuation center.
Liwat man na nakikihuron an opisyal sa Department of Social Welfare and Development na kun pwedesir liwat matawan nin cash for work an mga apektadong residente asin nagmamawot na matawan nin pandugang na ganansya urog na ngunyan na nagmamahal an presyo kan mga barakalon sa merkado.
