LEGAZPI CITY – Nabados an 15 anyos na babae makalihis an pirang beses na panlulugos na ginibo kan live-in partner kan saiyang ina sa banwaan kan Rapu-Rapu sa provincia kan Albay.
Segun ki Rapu Rapu Municipal Police Station, Municipal Executive Senior Police Officer, Police Executive Master Sergeant Anthony Espeso sa intrevista kan Bombo Radyo Legazpi na nagsumbong an biktima sa saiyang ina na bados na ini huli sa paulit-ulit na panlulugos saiya kan saiyang amaon.
Piggigibo suboot kan suspetsado an kahalayan sa biktima kada mahali an ina kaini sa saindang harong.
Tulos man na nakipag-koordinar an ina sa saindang ofisina asin tulos nagsunad nin 20 counts nin rape asin acts of lasciviousness.
Pigtaram pa kan opisyal na pigsubaybayan na kan saindang tropa an suspetsado poon kan pigsunad pa sana an kaso asin kan magluwas an mandamiento de aresto an tulos ninda ining inarestar.
Sa presente, nasa kustodiya na an suspek kan Rapu-Rapu Municipal Police Station mantang pig-hahalat na mailipat ini sa Bureau of Jail Management and Penology.
Padagos na man an saindang piggigibong information dissemination nganing magkaigwa nin kaaraman an publiko manungod sa mga kaparehong klase nin pang-aabuso.
Pangapodan ni Espeso na dae magduwang isip na magsumbong sa mga kapulisan enkaso maka-eksperyensya nin pang-aabuso nganing matawan tulos nin magkakanigong aksyon.
