LEGAZPI CITY-Dai mababa sa 14 katawo an nagadan makalihis an sarong pinagtutubudang pinaghihinalaang suicide bombing sa luwas kan himpilan kan pulisya northeast kan Pakistan.
Nangyari an pagsabog sa Kabal area sa Swat district kan Khyber Pakhtunkhwa province.
Segun sa mga otoridad, kaiba sa mga nagadan an limang pulis, walong sibilyan, asin an pinagtutubudang suicide bomber.
Maabot man sa 18 katawo an nairido sa insidente.
Kasabay kan pagsabog, igwang pigsasagibong pro-police rally sa lugar, alagad bako pa malinaw kun ini an target kan pag-atake.
Inako kan militanteng grupong Tehreek-e-Taliban Pakistan an paninimbagan sa nangyaring insidente.
Nagpahayag man nin matinding pakikidamay si Pakistani Prime Minister Muhammad Shehbaz Sharif asin kinondena an pag-atake.
Naglansar man nin operasyon an pulisya ngani matukoy asin madakop an iba pang posibleng imbuelto sa pambobomba.
Mientras tanto padagos na nahahampang an Pakistan sa naglalalang insurgencies, orog na sa mga border kaini kun sain target kan mga pag-atake an mga pulis asin militar.
