Tinawan nin palugit an nagbutas si dating Ako Bicol Party List Rep. Elizaldy Co sagkod sa Enero 15 para magsumiter kan counter-affidavit sa kasong plunder na isinunad laban saiya sa Department of Justice (DOJ).
Segun ki DOJ spokesperson Polo Martinez, warang nag-atendir na abogado ni Co sa preliminary investigation kan Lunes kaya tinawan siya nin palugit nganing simbagon an reklamo.
Ini an enot na kasong plunder na isinunad kan National Bureau of Investigation (NBI) laban ki Co sa DOJ, mantang may saro pa siyang kasong presenteng pig-imbestigaran.
Sa irarom kan Anti-Plunder Act, an plunder an pagkamal nin dae mababa sa P75 milyong ill-gotten wealth sa paagi kan serye nin ilegal na gibo.
Naenot na man na iniluwas an warrant of arrest laban ki Co asin 17 iba pa sa kasong malversation na nagkakantidad nin P289.5 milyon katakod kan flood control project sa Mindoro.
