Ipigheras ni Hidilyn Diaz, an pinaka-enot na Pilipinong nanggana nin bulawang medalya sa Olympics, na kaiba giraray an weightlifting sa Palarong Pambansa bilang demonstration sport.
Segun kay Hidilyn, haloy na niyang pinangarap na magin parte giraray an saiyang sport sa pinakadakulang national meet para sa mga estudyanteng atleta sa Pilipinas.
Pinasalamatan niya an Department of Education asin an Samahang Weightlifting ng Pilipinas sa pagtabang na maisakatuparan an obhetong ini.
Gigibuhon an Palarong Pambansa sa Ilocos Norte poon May 24 hasta sa June 2 kan presenteng taon.
Pigkakarkulong maabot sa 15,000 na mga delegado, kabale an mga atleta, coach, asin opisyal, an makikisumaro sa nasabing pakawat.
