Pinalawig pa an ceasefire sa pagultangan kan Lebanon asin Israel nin tulong semana, makalihis an nagin pag-oolay kan nagkapirang mga opisyal sa White House.
Marurumduman na pinangenotan ni US President Donald Trump an pag-oolay sa pagultangan ninda Israel ambassador to Washington Yechiel Leiter asin Lebanese ambassador to the US Nada Moawad sa Oval Office.
Ini sarong aldaw makalihis an Israeli strikes na guminadan nin limang indibidwal, kaibanan na an sarong mamamahayag.
Presente man sa nasabing pag-oolay sinda US Vice President JD Vance, Secretary of State Marco Rubio, US Ambassador to Israel MikeHuckabee asin US Ambassador to Lebanon Michel Issa.
Dae man nag-atendir sa nasabing pag-oolay an mga representante kan Hezbollah, na sarong Iran-aligned armed group na nakikipaglaban sa Israel.
Sinabi man ni Trump na nagmamawot man siyang magin tagapamagitan sa pag-oolay ninda Israeli Prime Minister Benjamin Netanyahu asin Lebanese President Joseph Aoun sa futuro.
