LEGAZPI CITY-Nahahampang ngonian si Vice President Sara Duterte sa patung-patong na mga reklamo sa Office of the Ombudsman na may koneksyon sa suboot kurapsyon.
Ipigsangat kan mga lider hale sa nagkapirang civil society groups an reklamong plunder, graft and corruption, betrayal of public trust, malversation asin iba pa laban sa Bise Presidente.
Segun kay Fr. Flaviano Villanueva, saro sa mga complainants, obheto kan isinangat na reklamo an matuldukan an ‘mockery’ o kawaran kan pagbisto sa ‘checks and balances’ natalaan sa konstitusyon.
Naglalaom man suboot sindang sa paagi kan Ombudsman, mapapakusog kaini an mga reklamong ipigsangat laban kay Vice Presidente Sara.
Pigmamawot man ninda na mapanimbag an Bise Presidente sa suboot maling paggamit kaini kan confidential funds na maabot sa kantidad na P612 million pesos.
Sinabi pa kaini na an maling paggamit suboot kan confidential funds na maabot sa labi sa kabangang milyon sa Department of Education asin Office of the Vice President an mga batayan ngani sabihong nagkaigwa nin reklamong ‘betrayal of public trust’.
Kaiba sa mga nagsangat nin reklamo o complainants laban kay Vice President Sara sinda Fr. Robert Reyes, Terisita Quintos-Deles, dating Presidential Adviser on the Peace Process, Dr. Maria Cielo Magno, dating Department of Finance Undersecretary asin iba pa.
Afuera sa bise presidente, kaiba man sa mga pigrereklam an 15 opisyal hale sa Department of Education asin Office of the Vice President, kaiba si Zuleika Lopez, na mismong Chief of Staff ni Vice President Sara Duterte.
