Ipigsugo ni US President Donald Trump na ibugtak an watawat sa half-staff bilang pagrespeto sa namaaram na si Pope Francis.
Susog sa White House na epektibo ini sa gabos na mga pampublikong edipisyo asin lugar siring man sa mga military post asin naval station.
Kairiba man an gabos na mga naval vessels kan Federal Government sa District of Columbia sa bilog na Estados Unidos asin mga teritoryo.
Matatapos sana ini sagkod sa aldaw kan paglubong kan namaaram na 88-anyos na Santo Papa.
Magigiromdoman na kan Lunes, Abril 21, inanunsyar kan Vatican an pagkagadan kan Santo Papa makalihis an labing sarong bulan na pagtenir sa ospital huli sa saiyang helang na double pneumonia.
