LEGAZPI CITY—Naarestar an tulong indibidwal makalihis an kinundusir na pinagsarong operasyon kan Philippine Drug Enforcement Agency Albay asin Daraga Municipal Police Station sa Barangay Kimantong, Daraga, Albay
Segun ki Albay PDEA Officer Noe Briguel, sa intrevista kan Bombo Radyo Legazpi, matrayumpo na nakabakal an saindang undercover agency nin pinagtutubudang shabu na may kantidad na P2,500, asin mantang nagbabakal an saindang personahe nahiling pa suboot sa harong na igwa pa nin naggagamit kan pinagtutubudang shabu.
Dugang ni Briguel na an operasyon hale sa mga report kan mga concern citizens kun saen an sarong indibidwal an nagpapabakal nin mga ilegal na droga asin nagpapagamit kan harong bilang session house.
Mantang na naggagamit kan ilegal na droga naobserbaran man na may tulong menor-de-edad digdi na aki mismo kan nagpapabakal nin ilegal na droga sa nasambitang harong.
An saindang operasyon nagresulta sa pagkakaarestar kan tulong suspetsado kairiba na an nagpapabakal nin droga asin nagpapagamit kan saiyang harong, mantang an tulong kaakian paramientras na ipig-turnover na sa kapamilya kaini.
Mientrastanto, an mga suspetsado posibleng mahampang sa kasong pagbayolar sa Republic Act 9165 o Comprehensive Dangerous Drugs Act of 2002.
