LEGAZPI CITY—Timbog sa ginibong buy-bust operation an sarong tricycle driver makalihis madakop sa aktong nagpapabakal nin ilegal na droga sa Barangay Centro Occidental sa banwaan kan Polangui, Albay.
Binisto an suspek na si alyas “Dong”, 51-anyos asin residente kan nasabing banwaan.
Basado sa report, napag-araman na kabale ini sa mga surenderee o Persons Who Use Drugs na nagsurender kan taong 2016 alagad liwat na nadawit sa ilegal na aktibidad.
Nakua hale sa saiyang posesyon an sarong heat-sealed transparent plastic sachet na may pigtutubudang shabu na may pigkarkulong gabat na 0.5 gramo asin street value na P3,400.
Afuera digdi nakua man saiya an siyam pang heat-sealed transparent plastic sachets na may laog nin pigtutubudang shabu na may gabat na apat na gramo asin estimated street value na P27,200.
Sa kabilogan nag-abot sa 4.5 gramos nin pigtutubudang shabu an narekober sa suspek asin may estimated street value na P30,600.
Ginibo an operasyon kan Polangui Municipal Police Station, Philippine Drug Enforcement Agency Albay, Provincial Intelligence Unit, asin 1st Albay Provincial Mobile Force Company.
Nasa kustodiya na kan Polangui MPS an suspek asin an mga nakumpiskar na ebidensya para sa magkakanigong disposisyon.
Mahahampang ini sa kasong pagbalgar sa Republic Act 9165 o ang Comprehensive Dangerous Drugs Act of 2002.
