LEGAZPI CITY—Apektado na an grupo nin mga tricycle drivers sa Catanduanes sa padagos na paghalangkaw kan presyo kan krudo sa nasambitan na probinsya.
Segun ki Jun Obusan Torres kan TODA Virac, sa intrevista kan Bombo Radyo Legazpi, na sa presente an presyo kan diesel sa saindang lugar nag-aabot na nin P85.25 an kada litro, an regular P89.75, mantang an premium P92.28 an kada litro.
Dugang kaini na pigtatangkilik man kan kadaklan na mga drayber an pagbakal nin mga tingi-tingi na bote nin krudo kun saen an presyo nag-aabot sa P75 an kada litro.
Pigtaram kan opisyal na dakula an agwat kan presyo kan krudo sa mga gasolinahan asin sa pagbakal nin tingi-tingi.
Igwa man suboot na kasunduan an munisipyo kan Virac asin an mga nagpapasada na pig-aapod na “automatic fare increase ordinance” na kun saen pag huminalangkaw nin P10 an presyo kan krudo otomatiko man na an pamasahe madugang nin P3 hanggang P5.
Mientrastanto, segun sa opisyal na pwedesir pang mapag-oloyan asin mapagtabangan na mabalanse an paghibaba kan krudo para dae man suboot maapektaran nin labi an mga pasahero sa nasambit na ordinansa.
