Legazpi City-Trauma an namatian kan mga pasahero kan MV Don Herculano vessel na hale sa Virac port makalihis ining dae makadaog sa Tabaco Port asin maraotan an makina kan barko sa parte kan Lagonoy Gulf.
Sa intrevista kan Bombo Radyo Legazpi kay Coy Santelices, pasahero kan MV Don Herculano, pinagkukwestyon kan mga pasahero an kawaran nin tulos na aksyon kan manhamiento kan barko huli sa pinaabutan pa nin haros lampas 14 oras na nagpalutang-lutang an barko sa naunambitang lugar.
Sa pag-istorya kan naunambitang pasahero sa parte pasana kan San Andres naririsa na kan mga pasahero na nagluluya na an dalagan kan barko alagad pinirit pa kan kapitan na idiretso asin dae nguna mag’apod nin responde hale sa Coast Guard.
Naging problema man kan mga pasahero an pagkaon huli na man sa kulang sa pagkaon asin igwa pang pasahero an nakaschedule sa hospital asin iba pang mga sitwasyon.
Nagpapasalamat na sana an mga pasahero na daeng raot nin panahon asin medyo maukol sana an kadagatan kaya salbado naging salbado pa an mga pasahero. Alagad pangapudan kan mga pasahero na mapanimbag an manhamiento kan Barko huli sa sinapar na trauma asin takot sa lado kan mga pasahero.
Nagpagirumdom man si Santelices sa lambang mga barko o vessel na nagbabyahe na siertuhon na nariparo nin marhay an sitwasyon kan barko antes na magbyahe para dae na mautro an nakakatrauma na dinanas kan mga pasahero kan MV Don Herculano.
